YANGA PRINCESS INYAGIYE RUANGWA QUEENS IBITEGO 5-0
Mu mukino wagaragayemo ubuhanga, umuvuduko ndetse n’ishyaka ridasanzwe, ikipe ya Yanga Princess yo muri Tanzania yanyagiye Ruangwa Queens ibitego 5-0, mu mukino wabaye nk’igaragaza itandukaniro rikomeye hagati y’amakipe yombi.
Uyu mukino wihariye waranzwe n’inyota yo gutsinda ku ruhande rwa Yanga Princess, aho ku munota wa 31, Mukandayisenga Jeannine yafunguye amazamu atsinda igitego cya mbere mu buryo bwiza cyane. Ntibyatinze kuko ku munota wa 40, yongeye gutsinda igitego cya kabiri, agaragaza ubuhanga n’ubukana budasanzwe.
Mu gice cya kabiri, Yanga Princess yakomeje gusatira izamu rya Ruangwa Queens ubudacogora. Ku munota wa 50, Precious yatsinze igitego cya gatatu, ibintu byarushijeho guca intege ikipe bari bahanganye.
Mukandayisenga Jeannine, wari mu bihe byiza cyane, yongeye gutsinda igitego cya gatatu ku munota wa 65, aba amaze kuzuza Hat-Trick y’agatangaza, ibintu byashimishije cyane abafana ndetse n’abakunzi b’umupira w’amaguru muri rusange.
Nk’aho bitari bihagije, ku munota wa 78, Asha yatsinze igitego cya gatanu, ashyiraho akadomo ku ntsinzi y’akataraboneka ya Yanga Princess.
Yanga Princess 5-0 Ruangwa Queens
Abatsinze ibitego:
- Mukandayisenga Jeannine ⚽⚽⚽ (31’, 40’, 65’)
- Precious ⚽ (50’)
- Asha ⚽ (78’)
Mukandayisenga Jeannine akomeje kwandika izina rye mu mateka y’umupira w’amaguru w’abagore, aho akomeje kwitwara neza mu gihugu cya Tanzania. Imikinire ye, ubuhanga ndetse n’ubushake bwo gutsinda bikomeje kumugira umwe mu bakinnyi bitezweho byinshi.
Iyi ntsinzi ya Yanga Princess si intsinzi isanzwe gusa, ahubwo ni ubutumwa bukomeye bwo kwereka andi makipe ko ari ikipe igomba kwitonderwa cyane. Ku ruhande rwa Jeannine, ni indi ntambwe ikomeye imushyira ku rwego rwo hejuru mu bakinnyi b’abanyarwanda bakina hanze.
Abakunzi b’umupira w’amaguru, cyane cyane ab’u Rwanda, bakomeje kumwishimira no kumushyigikira, biteze ko azakomeza gukora amateka no gutanga ibyishimo mu mikino iri imbere.
Byanditswe na Igiraneza Migisha Janviére
