Kuri uyu wa Gatanu taliki ya 19 ukuboza 2025; Abanyamuryango basaga 2200 n’abashyitsi bitabiriye Inama Nkuru ya 17 y’Umuryango FPR Inkotanyi ibera ku cyicaro gikuru i Rusororo.

Mu Nama Nkuru ya 17 y’Umuryango FPR Inkotanyi, Abanyamuryango bagejejweho amavugurura yakozwe mu nzego z’ubuyobozi bw’Umuryango, hashyirwaho urwego rw’inararibonye. Hemejwe kandi abagize Komite Nyobozi bashya aribo:

• Hon. Uwimana Consolée, Visi Perezida wa mbere. 
• ⁠Hon. kayisire Marie Solange, Visi Perezida wa Kabiri.
• ⁠Hon. Bazivamo Christophe, Umunyamabanga Mukuru.
• ⁠Bwana Gasana Karasanyi Stephen, Umunyamabanga Mukuru Wungirije.

Mu kiganiro gifite insanganyamatsiko igira iti “Kubaka umusingi uhamye w’Igihugu cyacu”, Abanyamuryango bunguranye ibitekerezo ku cyakorwa mu kurushaho gushimangira iterambere u Rwanda rumaze kugeraho.

Umuyobozi Mukuru w'Urwego rushinzwe Mine, Peteroli na Gazi, Alice Uwase yagaragaje ko mu kubaka umusingi w’Igihugu, urwego rw’ubucukuzi bw’amabuye y’agaciro, rubigiramo uruhare rukomeye. Yavuze ko amabuye y’agaciro mu gihugu cyacu yahozeho, kandi ko ubucukuzi bwayo bukorwa guhera mu 1927. Mu Rwanda, abantu ibihumbi 92 bakora mu bikorwa by’ubucukuzi bw’amabuye y’agaciro. U Rwanda rufite amabuye akenewe cyane ku Isi harimo Coltan, Gasegereti, Wolfram, Lithium, Beryl n’ayandi.

Diane Mukasahaha washinze uruganda rukora imyenda rwitwa Dikam yatanze ubuhamya bw’urugendo rwe. Yavuze ko yatangiye mu 2018 afite abakozi babiri mu rugo rwe, hari nyuma yo gusezera akazi yakoraga nk’umuntu wize ubuforomo. Ubu uruganda rwe rufite abakozi 400, rukora imyenda 10000 ku munsi. Afite intego yo gutangira gukorera mu Rwanda ibitambaro akoresheje ipamba riva mu karere.

Umunyamabanga wa Leta muri Minisiteri y’Imari n’Igenamigambi, Hon. Tesi Rusagara yavuze ko ubukungu bw’u Rwanda buzamuka cyane. Mu gihembwe cya gatatu cy’uyu mwaka, umusaruro mbumbe wageze kuri 11,8%. Yagaragaje ko mu kwishakamo ibisubizo, u Rwanda rutagishingiye ku nkunga, ahubwo rwishatsemo ibisubizo bigizwemo uruhare n’imisoro ikusanywa mu gihugu, aribyo bituma ingengo y’imari ubu itarambirije ku bandi. Urwego rw’imari narwo umutungo warwo ugize 65% by’umutungo mbumbe w’Igihugu.

Rwiyemezamirimo Jean Claude Uwizeyemungu yashinze uruganda Mahwi Grain Millers rukorera mu Cyanya cy’Inganda cya Bugesera, aho rusya ibigori rugakuramo ifu n’ibiryo by’amatungo. Yatangiye kwikorera akiri urubyiruko mu 2009. Ubu uruganda rwe rufite ubushobozi bwo gutunganya toni 500 z’ibigori ku munsi, rwatanze akazi ku bantu barenga 350 biganjemo urubyiruko. Uru ruganda rukorana na koperative z’abahinzi b’ibigori bari hagati y’ibihumbi 27 n’ibihumbi 30. Mu 2024, Sosiyete ye yagiye ku Isoko ry’Imari n’Imigabane ibona miliyari eshanu z’amafaranga y’u Rwanda yo kugira ngo rukomeze gukora neza. Yashishikarije urubyiruko gukoresha amahirwe rwahawe n’Igihugu mu kwihangira imirimo.

Umuyobozi Mukuru w’Urwego rw’Igihugu rw’Iterambere, Jean Guy Africa, yavuze ko icyerekezo cya 2050 kigamije kugira u Rwanda igicumbi cy’ishoramari, ubukerarugendo, gutwara abantu n’ibintu na serivisi. Kugira ngo ibyo bizagerweho, bisaba ko akazi gakorwa mu buryo bwihuse n’ababishinzwe bagafata inshingano, kunoza imitangire ya serivisi yaba ku baturage no ku bikorera nabyo bigomba kubakirwaho.

Umunyamabanga wa Leta muri Minisiteri y’Ikoranabuhanga na Inovasiyo Hon. Yves Iradukunda yavuze ko mu bikorwa byose, ikoranabuhanga ritasigaye. Uyu munsi 70% bya serivisi ziri ku rubuga Irembo zishobora kuboneka mu gihe kitarenze isaha, bikaba byaragabanyije ugusiragira na ruswa. 

“I do not know of any nation with citizens better than ours. I say this because of where we have come from: divisionist politics, genocide. And yet we have reached a point where our people stand together, even as the world keeps trying to take them back to that history. The first place where outsiders who seek to destroy us have failed is with our citizens. They tried to divide Rwandans again, to create conflict among them, but our people resisted—and those efforts failed.” Chairman Kagame | 17th RPF Congress.